ЗУРМАЛ САРНАЙН ҮНЭР

Анир алдарсан шөнөөр үсний ширхэг газарт унах сонсогдоно
Амгалан ертөнц мөнхийн зүүд мэт чимээгүй дүнсийнэ
Мөнх мөнх бусын хооронд гийчин адил ирээд буцах
Мөн чанарыг мэдрэх гэж ертөнцийн анир алдрана
Эхийн хэвлийд ураг бүрэлдэхүйд газрын цөм шатаж
Эх газарт солир унахуйд ертөнцөөс нэгэн буцаж
Жам ёсны бүхнээс жаргал хийгээд зовлонг хайхуйд
Жаахан үдэлсэн хугацаа хэтэрхий ихээр чамлагдана .........

Анир алдарсан шөнөөр  ширхэг үнэн зүрхэнд унана
Алтан харгана бэлхүүс ороон дээш өгсөнө
Үнэн хийгээд худалын хооронд элээж дуусах
Өнө мөнхийн хоосон дотроос буйг хайна
Амласан сүүний дусал бүрээс бодолд нэвчсэн хайр амтагдана
Алсран одсон он жилүүд сувдан хэлхээ шиг бутарсан үзэгдэнэ
Сарны таталцалд далайн ус сэтгэл шиг давалгаалхад
Сая жилийн хөндүүр зүрх өвтгөн тэнд оршино

Анир алдарсан шөнөөр үсний ширхэг газарт унах сонсогдоно
Амгалан ертөнц мөнхийн зүүд мэт чимээгүй дүнсийнэ .........

Хамгийн жаргалтай мөч
Хацарт минь улаарч
Утга төгөлдөр эрх чөлөө
Учрал дагаж алдуурахад
Уух ус, амьсгалах агаар гуйн
Урд чинь би сөгдөе.

Уух ус минь болохын цагт
Уруулд бөнжигнөж үлдсэн
Дусал нь чи байг
Амьсгалах агаар минь болохын цагт
Амт хийгээд үнэрийн хамт шатсан
Амраглал нь чи байг

Чиний ирсэн шөнө гунигийн үүл арилдаг
Чийглэг дулаан бие рүү чинь хүслийн бороо асгардаг
Халуу шатсан сэтгэлийн минь ганг чи тайлдагч
Хайртай гэдэг үгэнд чинь би хар дарж сэрдэг

Чиний явсан шөнө гунигийн үүл сэтгэл бүрхэж
Чив чимээгүй нам гүмхэн тийм орчин бүрддэг
Гараад явахтай чинь зэрэгцээд хаалга ч тогшилгүй
Ганцаардал орж ирээд бид чамайг хүлээдэг

Монголын бахархал

Гэрийн гадаа адуу янцгааж, ээжийн чанах шаргал цайны үнэр ялдамд өглөөг угтах тохиол зөвхөн Монгол хүн бидэнд тохиожээ.  Дөрөө шүргэм халиуран ногоорох өвс ургамал, алсын тэртээгээс алжаал тайлан бургих  ариун тунгалаг гол, мөрөн, нүд алдам онгон сайхан тал,  зөвхөн Монгол хүний дээр зурайх  цэлмэг хөх тэнгэрээ бид шүтье. Найман зуун  жилийн тэртээх дэлхийг донсолгосон хүчирхэг төрт ёс, түүхээ ярин онгирох ховорхон хувьтай хүмүүс зөвхөн бид. Эх хангай газрыг  хайлан уяраах Монгол ардын уртын дуу ганцхан манайд бий.  Хорвоогийн хамаг явдлыг хоёрхон чавхдаст багтаан хүний сэтгэлийг уяраах хосгүй оюуны бүтээл Морин хуурыг зөвхөн Монгол хүн зохиосон  гэж бахархъя. Жороо морины ганган явдалд амрагийн дуу аялах Монгол хайр сэтгэл зөвхөн манай залууст тохиосон гэж гайхуулъя. Байгаль эхийн бүхий л зан аашийг харамгүй хайрласан хавар, зун, намар, өвөл гэх  жилийн дөрвөн улирал манай эх оронд хайрлажээ гэж байгаль ээждээ бид талархъя.  Амны цангаа тайлан ундаалах айраг, цагаа зөвхөн Монголчууд хүртэх ёстой хишиг байж гэж би баярлъя.  Хөх толбоороо ижилсэн, айлсах Монгол заншил зөвхөн бидний ёс.  Морин дэлэн дээр гараа алдлан давхин, нутгийн салхиа амтлан, цэлмэг тэнгэрээ магтан дуулах хөх толбот  Монгол хүн манайх.  Найман шарга адуу зэрэглээт холоос зүүдэнд дунд минь давхиж, буурал ээжийн есөн хүслийн цацал үргэлжид даллан дуудах Монголын сайхан орон би таньд хайртай.   Дэлхийн өнцөг булан бүрт аж төрж, оршин суугаа хөх толботой Монголчууддаа Монгол улс тунхагласаны 84 жилийн ойн баярын мэнд хүргье

Хэнэггүй зогсчихоод л хайраар тоглоод
Хэрэгтэй хэрэггүй хайрын үг шидлээд л

Алга дарам өчүүхэн зүрхийг
Архинд живүүлж шанлалд хутгаад л

Сансан ч юм уу сайнаагүй ч юм уу
Сайхан үгээр зүрх баясгаад л

Үүрдийх ч юм шиг зуурдых ч юм шиг
Үнгэн хайраар сэтгэл гижигдээд л

Бодолгүйхэн хэлсэн ганц үг
Болзоонд ирэх амлалт аваад л

Чихэнд шивнэх нялуун үгс
Чиний хуурамч гэдэгийг батлаад ч байх шиг

Би хуурамч хайранд дургүй ээ
Би хуурмаг сэтгэлд дургүй ээ
Би худалч хүнд дургүй ээ
Би хууртхыг хүсдэггүй... худал бүхэн чихэрлэг байдаг